Ons verwelkom jul met trots by ons webwerf – die toonvenster van die Durbiefamilie se hartklop. Mag dit vir elkeen ‘n aangename ervaring wees om vir ‘n wyle te loer na ons doen en late.

Elkeen droom van ‘n skool waar hul gelukkig kan wees, waar kennis en ervaring ontsluit word, waar lewenslange vriendskapsbande gebou word en ‘n leeftyd se herineringe gemaak word, van ‘n skool waar Akademie, Sport, Kultuur, Leierskap en Leefstyl op die hoogste denkbare vlak gebesig word: As dit ook jou droom is, dan hoef jy nie verder te soek nie.

Maar wat maak hierdie trotse Afrikaanse skool, wat eersdaags tweehonderd jaar oud sal wees, dan anders?

Ons leef ‘n eenvoudige waarheid: Dat geluk ‘n wilsbesluit is waarin elke keuse ‘n gevolg het en daarom strewe ons daarna dat elke kind die nodige geleentheid gegun word en werksetiek gevestig word, om juis dit te kan doen. Die lewe staan egter nie stil nie en niemand van ons kan die sand wat deur die uurglas loop stop of selfs poog terugdruk nie. Ons poog dus dat ons leerders voluit moet leef en beleef. Ons moedig nuwe ervarings aan en skroom nie om op te staan vir wat reg en regverdig is nie. Ons ontsluit graag verskuilde talente, toon empatie met ander se uitdagings, verwerp nooit ons leerders nie, gee nie moed op nie, kyk nie ander pad vir die negatiewe van ons land nie, akkommodeer uiteenlopende menings en standpunte, maar is ook nie bang om erkentenis te gee aan ons Here nie.